 |
| Pidabdab Malajah Basa Bali Becikne Saking Alit |
Basa Bali wantah pinaka basa ibu, sangkaning
pinaka ibu majanten patut kasayangang wiadin kauratiang. Nanging kasuen-suen,
basa Bali sayan katilarin olih krama Bali. Sangkaning punika, makudang-kudang
angga ngosahang parindikan punika rumasuk sang ngawa rat. Wenten raris pidabdab marupa kawentenan
penyuluh bahasa Bali, perda kantos wenten dina mabasa Bali. Sekadi pamargin dina
mabasa Bali sane
sampun kamargiang ring wewidangan kabupaten Badung. Napi malih ring rapat paripurna DPRD irika
taler nganggen basa Bali. Punika taler ring kota Denpasar. Ring kota Denpasar sampun
kapikukuhang dina mabasa Bali saha sampun wenten surat edaran Walikota
Denpasar. Surat edaran Walikota Denpasar wantah katujuang sajroning nyaga
karajegan saha kalestariang budaya Bali pamekas basa Bali. Samian instansi
rumasuk lembaga pendidikan saking undagan TK kantos SMA/SMK kapatutang nganggen
basa Bali nemonin rahina Buda wiadin rahina purnama-tilem. Dina mabasa Bali katureksain
dahat becik kalaksanayang, yadyastun kamargiang arahina satunggil wuku. Melarapan antuk punika kaaptiyang prasida nincapang rasa tresna anak alit wiadin yowana majeng
basa Bali. Makekalih kabupaten/kota puniki majanten
sandang dados tetuladan saha kaaptiyang sida nglimbak ring wewidangan sane
tiosan.
 |
| Malajah Basa Bali Antuk Dolanan Miwah Gending |
Sios ring punika, ring galahe mangkin mabebaosan sane sayuwakti nganggen basa Bali arang pisan kapanggihin. Sane akeh wantah nganggen basa campuran, basa Indonesia macampuh sareng basa Bali.
Ring genah sane sapatutnyane dahat
nginggilang basa Bali saha patut dados tetuladan sekadi puri wiadin gria, taler
sampun akeh sane nilarin basa Bali.
0 komentar:
Post a Comment