 |
| Foto : Pura Penataran Agung Besakih |
Kaluihan pura ring Bali majanten prasida ngadautin manah wisatawan lokal wiadin wisatawan dura negara. Kaluihan pura tegep antuk pakantenan palemahanipun ngawinang sayan akeh wisatawan rauh ke Bali. Mapaiketan punika, pengelola genah wisata wiadin désa adat kaaptiyang mangda niténin becik kasucian pura. Utamaning mandala pura mangda sayuwakti luput saking kawéntenan wisatawan, mawinan nénten kantos wénten sane ngletehin pura.
Kaluihan
kabudayan Bali pamekas pakantenan saha taksu pura ring Bali sampun mabukti prasida
ngadautin manah wisatawan, sekadi sane prasida kakantenang ring Pura Besakih. Satunggil
rahina setata wénten wisatawan rauh irika. Nanging wisatawan sane rauh ke Bali
sampun majanten nénten uning ring geguat ngranjing ka pura, napi malih yéning nénten
wénten guide Bali wiadin angga saking pura ngénterang para wisatawan rikalaning
ngranjing ka pura. Pengelola genah wisata wiadin désa adat, kapatutang mangda
nguningayang ring guide wiadin wisatawan mangda nénten kantos ngranjing ring utamaning
mandala. Satunggil rahina, taler kaaptiyang mangda setata wénten angga saking pura
sané majaga, nureksain satunggil wisatawan sane ngranjing ka pura, bilih-vilih
pura sane taler pinaka genah wisata. Yadiastun ring makudang-kudang pura sampun kadagingin tatenger wiadin awig-awig sajroning ngranjing ka pura antuk basa Indonesia wiadin Inggris, nanging tatenger sané wénten sering taler kirang kauratiang, kakaonang antuk manah wisatawan sané meled pisan uning indik napi kemanten sane wentén ring pura. Kasucian pura puniki wantah amongan saking
samian angga. Geguat puniki nénten ngingkupin pura kahyangan jagat kemanten, nanging
taler ring pura desa wiadin paibon. Geguat ring desa adat sane marupa
awig-awig, mangda tinas ngunggahang saha nlatarang indik pamidanda majeng sira
ugi sané ngletehin pura.
